🔴तांबेपुरा परिसरात विजेचा लपंडावामुळे नागरिक त्रस्त.. 🔴बेजबाबदार अधिकारी ,कर्मचाऱी झिरो.वायरमनच्या भरवशावर मस्त..

        अमळनेर.दि 17 ऑगस्ट ( प्रतिनिधी )

स्वातंत्र्यदिनाचा सण संपला तरी अमळनेर शहरातील तांबेपुरा परिसरातील नागरिकांना मात्र अंधारातून स्वातंत्र्य मिळालेले नाही. १५ ऑगस्टपासून तांबेपुरा परिसरातील अनेक कॉलनींमध्ये विजेचा लपंडाव सुरू असून, अनियमित वीजपुरवठ्यामुळे नागरिक कमालीचे त्रस्त झाले आहेत.

एकीकडे पाणीपुरवठ्याचे तीन-तेरा वाजलेले असताना—आठ-दहा दिवसांतून एकदा, तेही रात्री-अपरात्री सुटणाऱ्या नळाच्या वेळीच वीज गायब होत असल्याने नागरिकांची नाहक ससेहोलपट होत आहे.

'झिरो वायरमन'च्या भरवशावर कारभार!

महावितरणच्या जबाबदार अधिकाऱ्यांनी व कर्मचाऱ्यांनी संपूर्ण परिसराचा कारभार अनधिकृत 'झिरो वायरमन'च्या भरवशावर ढकलून मोकळे झाले आहेत. नागरिक समस्येबाबत फोन लावतात, तेव्हा अधिकारी एकतर फोन उचलत नाहीत किंवा उचलल्यास उडवाउडवीची उत्तरे देतात. जर एखाद्या कामादरम्यान या अनधिकृत 'झिरो वायरमन'चा अपघात झाला, तर त्याची जबाबदारी कोणाची? असा संतप्त सवाल जनता विचारत आहे.

दलाली आणि सेटलमेंटचा सुळसुळाट

विद्युत विभागातील अकार्यक्षमतेचा फायदा घेत परिसरात दलालांची मोठी टोळी सक्रिय झाल्याचा गंभीर आरोप नागरिकांनी केला आहे. एखाद्या ग्राहकाच्या मीटरबाबत संशय आल्यास किंवा वीज चोरीच्या नावाखाली या दलालांकडून सर्वसामान्य नागरिकांना अवाजवी दंडाची भीती दाखवली जाते. त्यानंतर भीतीपोटी हजारो रुपयांची परस्पर 'सेटलमेंट' करून सर्वसामान्यांना लुटले जात असल्याच्या चर्चा परिसरात रंगल्या आहेत.

नागरिकांच्या सेवेसाठी नियुक्त झालेले अधिकारी जर स्वतःची कर्तव्ये विसरून जनतेला वेठीस धरणार असतील, तर वरिष्ठ अधिकाऱ्यांनी या प्रकरणात तात्काळ लक्ष घालून तांबेपुरावासीयांना न्याय द्यावा, अशी जोरदार मागणी होत आहे.

नागरिकांची न्यायाची मागणी

🛑तांबेपुरा परिसरातील अनियमित वीजपुरवठा त्वरित सुरळीत करावा.

🛑सरकारी कामात अनधिकृत 'झिरो वायरमन'चा हस्तक्षेप थांबवावा.

🛑वीज चोरीच्या नावाखाली चालणारी दलाली आणि परस्पर सेटलमेंटची चौकशी करून दोषींवर कारवाई व्हावी.

नागरिकांच्या सेवेसाठी नियुक्त झालेले अधिकारी जर स्वतःची कर्तव्ये विसरून जनतेला वेठीस धरणार असतील, तर वरिष्ठ अधिकाऱ्यांनी या प्रकरणात तात्काळ लक्ष घालून तांबेपुरावासीयांना न्याय द्यावा, अशी जोरदार मागणी होत आहे.